يا رايح ألف ليلة ومسافر للخيال
بأحّمّلك أمانة
ترجعلى بأى حال
وتجيبلى معاك أمارة وإجابة للسؤال
سلم على شهرزاد
وهات منها الخبر
اسألها ليه مجاش
بُكرا
ولا الشاطر عمر
فكّرها الصبر طال
والعيشة بقت محال
لا ليلنا بانله آخر ولا بكرا بانله حال
حلّفها بكل ذكرى
غالية وزمان جميل
تحكى عن كل فارس
وعن كل جواد أصيل
عملوا م الأرض دية
قلاع وحصون قوية
منها صالوا وجالوا وحرروا البرية
خلّيها ألف مرة
تحكى عن أحلى بكرا
لو عاد صلاح الدين
وجاب معاه حطين
ميّل واهمسلها
بالقصة كلها
وسيبها للكون بحاله تحكى بطريقتها هية
من غير كان وكان
ولا سالف الازمان
دى حكاية بتجرى الآن لعروسة مسبية
يا ناس كيت وكيت
ومهما قلت وحكيت
حتى لو بكيت شوية دموع عنية
لا أمن ولا أمان
ولا حلم له مكان
حتى الدين مهان
ويقولوا حقوق إنسان أما نكتة دية
كفاية بقى امتهان
هودا زمان
دا زمن الهوان
يا عرايس خشب مسحوبة متغمية
وآه ياست المداين
يا أحلى زهور الجناين
يا عروسة الأماكن من الجرح اللى بية
يوسف فى البير يصيح
والعدرا والمسيح
والمصطفى مسراه ف إيدين نجسة وبغية
المسجد الأسير
ينده على كل طير
بيحلّق ف السما ويأكد له الهوية
والقبة والمآذن
والسرداب والمخازن
والهيكل المزعوم وكل الحجج الغبية
فاهمين ومش غافلين
أقباط ومسلمين
وكلنا حالفين ما نفرط ف القضية
يا حماس فين حماسك
ويا فنح لمى ناسك
دا العدو اللى ماسك زمامنا بايد قوية
فوقوا بقى يا ناس
دى الغالية اللى بتنداس
اللى م الساس للراس طاهرة وحرة وأبية
بلّغها وقولها
إن احنا ف حقها
غلطنا قبل سابق وقبلنا بأسرها
بالغصب بالرضا
دا شىء وانقضى
أهم من كدا بايدينا نردها
بايدين كل الفصايل
بايدين كل القبايل
اللى سووا الهوايل زمان فى حبها
وأكيد يا شهرزاد
ضرورى ف المعاد
جاى الشاطرعمر
جايب أحلى خبر
وكمان صلاح الدين
مليون صلاح الدين
يرجعولنا العزة فى يوم كما حطين
وف تالت الحرمين
نصللنا ركعتين
وأجراس الكنايس المكتومة سنين
تحضن صدى التراتيل
ف الصبح وعز الليل
وتقِبل الصلبان
اللى بقالها زمان
بتعانى م الطغيان وم الهموم محنية
واللى اغتاله صهيون
من أشجار الزيتون
هنغرس تانى غيره ف القلب وف العيون
عشان نبعت سلام
مع كل هديل حمام
رسالة نور وحب منها لكل الكون
وف سما المدينة
أم عيون حزينة
نزرع نجوم جديدة والمستحيل يهون
وتحكى يا شهرزاد
ف ليالى الأعياد
وف كل مناسبة حلوة
حكاوى جميلة دافية
تشبه أحضان تشرين والأحلام الشتوية
وف آب ولاّ ف نيسان
نلقاها ف كل زمان
أحلى زهور الجناين
وعروسة الأماكن
دى ست الحسن هية وكمان ست المداين
أيوا ست المداين
طبعا ست المداين
ليست هناك تعليقات:
إرسال تعليق