مشينا

ودعنا أحلامنا
ومشينا قدمنا
حيرة وضياع وعدَمْ
وورانا أيامنا
وعمر ضاع منا
واحساس فينا اتهَدَمْ
دابين فى الذكريات
نبكى على اللى فات
والقلب اللى اتظَلَمْ
فاكرين كل شىء
من أول طيف برىء
لنهاية الطريق
وشوك ما رَحَمْ
ياااه يا طريقنا ياه
راجعينك تانى ياه
نمشيك من غير قَدَمْ
ويا قسوة الطريق
اللى من غير رفيق
يهّوِّن الألَمْ
لكن هتفرق إيه
ما عاد يا دنيا فيه
شىء نبكى عليه
أو يستاهل نَدَمْ
بعد اللى راح خلاص
مات جوانا الاحساس
ويعيش ازاى يا ناس
ومن روحه اتحَرَمْ
ارجوك بقى يا زمانى
سافر بعيد وانسانى
وانتى كمان يا أمانى
كفاياكى كَرَمْ
إيه معنى للصباح
ولا الدنيا البراح
والطير من غير جناح
والقلب اتهَزَمْ
وآه من الأيام
ومرارة الآلام
لما تضيع الأحلام
والقلم اللى رَسَمْ
لكن يا طريق ماشين
ع الشوك والأنين
راضين أو مش راضين
دا قدر لينا اتقَسَمْ